РУСКИ КЕРЕСТУР – Вчера после 11 годзин у Руским Керестуре даскельо минути падал каменєц, перше дакус густейши, а потим дробнєйши з дижджом, на два-три заводи блїзкало и гирмело. Нєпогода нє тирвала длуго, алє нє запаметане же би самим початком априла падал каменєц.
Каменєц очкодовал квитки на овоци, а як гваря упутени, на житу нє могол направиц векшу чкоду, як анї на пошатей паприґи, хтора ище позакривана у пластенїкох. Пластенїки баржей очкодовал моцни витор, хтори дул вовторок вноци.
Як дознава Рутенпрес, керестурски представительства осиґуруюцих хижох ище нє почали осиґуровац шаца од нєпогодох, а найвироятнєйше то почню по Велькей ноци.