БЕОҐРАД – З нагоди 70-рочнїци побиди над фашизмом, у Амбасади України у Сербиї у Београдзе вчера уручени припознаня „Квитки червеного маку”, медзинародного символу здогадованя и помиреня на шицки жертви у войнох. Припознаня пейцом Руснацом и єдному Українцови уручела одправнїк роботох Амбасади України у Сербиї Євгения Филипенко, а достали их Мирон Костельнїк Ґецийов, Йоаким Надь Митьов, Любо Варґа Пинтеров и Яким Дудуш Мийов з Руского Керестура, Янко Уйфалуши з Нового Саду и Зеновий Гемон з Индїї.
Борци-ветеранє з наших местох, вєдно з борцами Трецого українского фронту, у Другей шветовей войни участвовали у биткох на Батини, на рики Дунай и на Болману, на рики Драви. Векшина з нїх свойо войованє закончела у Словениї.
После вчерайшого приєму у Амбасади, ветеранє вєдно з представителями Амбасади України и госцами положели венци и квеце на памятнїк Ошлєбодительом Београду и на памятнїк Борцом Червеней армиї на Калемеґданє. Тиж так, у парку Амбасади засадзели українске националне древко – червену калїну, як знак здогадованя на вельки Дзень побиди над фашизмом.
На вчерайшим приєму у Амбасади присуствовал и заменїк предсидателя Нациналного совиту Руснацох Йовген Мудри, як и делегация Союзу Руснацох Українцох Сербиї, на чолє з предсидательом Боґданом Виславскийом.
