Сениорска екипа ФК „Славия” зоз Нового Орахова треци рок нє бави лиґашски змаганя. Терен ше поряднє отримує, ту и провадзаци обєкти, зоблєкальнї, туши… алє сениорскей екипи Славиї нєт. Но, то лєм затераз таки стан фодбалу у тим нашим валалє. Кед же ентузиязем потирва и будзе потримовки, „живот” на стадион ше годзен пошвидко врациц, насампредз, дзекуюци упартосци Якима Гайдука Кика, дакедишнього фодбалера ораховскей Славиї.
Старши жителє Нового Орахова ище вше ше здогадую екипи ФК „Славиї” хтора бавела седемдзешатих рокох прешлого вику. Гваря: так добре бавели же по Суботицу нє було такей добрей екипи.
– У екипи теди бавели: Яким Гайдук, старши, Томислав Малацко, Тибор Леп, Пишта Горват, Золтан Петраш, Дюра Бики (зоз Миклошевцох), Владимир Ходак, Юлин Емейди, Стоян Стоїлькович Циґо… Но, заш лєм, найлєпши були Владимир Ходак Тирке, Шандор Дудаш и Єни Петраш. Ходака волали до Червеней гвизди, Дудаша до новосадскей Войводини, а Петраша до суботицкого Спартаку. Но, анї єден нє напущел Славию – гварел Ораховчань Любо Рац, здогадуюци ше на тоти часи.
Остатнїх рокох найвецей проблеми, кед слово о фодбалу и спорту у Новим Орахове, то же нєт пенєжи. Безпенєжносц у спорту евидентна, так повесц, у шицких наших местох и клубох. Кед слово о Новим Орахове ище векши проблем то же у валалє вше менєй младих.
– Одход младих до иножемства нам вельки проблем. Нє лєм пре спорт, алє и вообще. По статистичних податкох лєм за єден рок зоз Орахова пошли найменєй 30 млади особи. За наш мали валал то барз вельке число – наглашел Любо Рац
ФОДБАЛ ЯК СУДЬБА
Дзекуюци упартосци Якима Гайдука Кика, дакедишнього фодбалера Славиї, назберало ше шумне число дзецох хтори заинтересовани за фодбал. Кико зоз спортскей, односно фодбалскей фамелиї. Його оцец хтори ше исто вола як и вон, Яким Гайдук Кико, бавел у екипи ФК „Славия” зоз седемдзешатих рокох. У екипи хтора у аналох Клуба зазначена як найлєпша.
– Фодбал сом почал бавиц 1979. року у екипи АИК зоз Бачкей Тополї. Ту сом бавел єден рок, а потим сом прешол бавиц до Славиї у Новим Орахове. Бул сом, як то идзе, член пионирскей селекциї, потим у екипи подростку и на концу у сениорскей. Зоз кратшим претаргнуцом кед сом бавел у Торньошу, од 1993. по 1998. рок, за екипу Славиї сом бавел по сам конєц 2012. рок. Теди сом престал бавиц прето же сом покалїчел колєно. Пред концом активного бавеня фодбалу бул сом и тренер и орґанизатор у Клубу. Вец ме сцели положиц и за предсидателя Клуба, цо би уж було вельо обовязки за мнє, та сом ше поцагнул. Так повесц, одкеди сом напущел фодбал и фодбал напущел Орахово – гварел Яким Гайдук Кико.
Любов ґу фодбалу го заш врацела на терен, алє тераз свойо искуство и любов ґу тому спорту преноши на младших. Сениорска екипа Славиї нє бави од 2013. року, насампредз пре пенєжи и прето же нєт досц бавячох хтори би бавели у першим тиме.
– На щесце, удало нам ше формовац два селекциї нїзшого возросту у нашей Славиї. Маме два ґрупи по 15 хлапцох у селекциї когуцикох (по пияту класу основней школи) и селекциї пионирох (возрост од пиятей по осму класу основней школи). Затераз добре робиме и наздавам ше же ми ше поспиши затримац их по сениорски возрост. За наш мали валал то досц чежко, бо зме и потераз мали од осем до дзешец фодбалерох зоз Нового Орахова. Проблем у тим же у екипи треба мац голєм шеснац бавячох, а ми их нє мали, та зме их мушели привесц зоз других местох – гварел Кико.
У тей хвильки, кед би сцели бавиц у лиґи мушели би мац на рахунку 400 000 динари. Пенєж, можебуц, нє таки проблем, алє бавяче хтори би були з Нового Орахова, хтори би мали мотив и сцелосци бавиц. Општинска лиґа би такой у тей хвильки могла мац пейц екипи хтори би бавелли змаганя. То екипи: Стара Моравица, Победа, Нєґош „Б” (зоз Ловченцу), Пачир „Б” и Томиславци. Ораховчанє би були шеста екипа, а як надпомнул Кико, могло би ше у општини назберац ище пейц екипи.
ДЛУГА ТРАДИЦИЯ
– Нове Орахово ма длугу фодбалску традицию. Екипа Славиї призначовала добри резултати у своєй лиґи. Дакедишнї фодбалере ше ище вше сходза бавиц на турнире ветеранох. За 1. май каждого року маме турнир хтори ше вола „Владимир Ходак Тирке” на хторим бавя екипи у хторей старши бавяче Славиї. Турнир орґанизує дакедишнї бавяч Славиї, Тибор Леп, а финансийно го потримує тиж дакедишнї бавяч Драґан Блаґоєвич Бато – гварел Кико.
Останє запаметане же ФК „Славия” два раз була на другим месце у општинскей лиґи Бачка Тополя. Памета ше же дакеди шицки бавяче у екипи були зоз валалу, а змаганя провадзели и сто патраче на стадиону.
Лиґашски змаганя за младши селекциї почали. Кико затераз на змаганя водзи лєм селекцию когуцикох (6. класа), бо у пионирскей селекциї нє ма досц бавячох. У лиґи єст осем екипи, а ораховчанє ше цеша же су нє остатнї на таблїчки. За роботу зоз младшим катеґориями клуб достава 120 000 динари рочнє. Понеже Кико и далєй „алфа и омеґа” у Клубу, як гварел, то досц пенєжи, та Клубу остава пенєж зоз хторим ше доправя и реновира просториї. Ораховчанє окрем добрих резултатох на своїм терену, од своїх младших катеґорийох очекую же ФК „Славия” враци дакедишню славу и пиху.
ДАКЕДИ УСПИШНИ „СЕЛЯНЄ”
ФК „Славия” формована на инициятиву младежи и жительох, любительох фодбалу, Нового Орахова 1947. року. Клуб ше на початку волал „Задружни селяк”, алє го у валалє медзи собу волали Спартак. Нє було им право кед ше пред змаганьом коментаровало же „бавиме зоз екипу селякох”. Од 1954. року Клуб достал мено Славия.
У першей менованей управи Клуба були: Антал Вицеи, Янош Фазекаш, Янош Лоцкаи и Лайош Сакмань.
Найвекши успих Клуб посцигнул 1971. року кед ше спрам посцигнутих резултатох пласовал за висши ранґ змаганя у Суботицкей лиґи. У тей лиґи бавели три сезони.
Як пише у аналох Клубу, найлєпши тим творели: М. Кончар, Й. Роштинґ, Я. Гайдук, Н. Марич, Дю. Дудаш, С. Дудаш, М. Пап, Л. Хорват, Й. Емейди, Т. Малацко, С. Стоилькович, Ц. Симич, В. Гайдук, В. Ковач и В. Ходак.
Найлєпши тренере у Клубу були: Милан Вукмирович, Милан Шупица и Бела Пинтер.
Владимир Ходак бул найлєпши бавяч.
