КОЦУР – Парохиянє коцурскей грекокатолїцкей церкви, як и нашей церкви зоз Савиного Села и других местох, вчера преславели Треци дзень Русадльох, односно Завитни дзень и з тей нагоди нащивели нашо святилїще Водицу коло Руского Керестура.
Коцурци до Водици пришли на автох, дзе ше могли висповедац при о. Яковови Куличови и керестурскому капеланови о. Владимирови Малацкови.
Завитну Службу Божу на 10 годзин служели парох коцурски о. Владислав Рац и о. Владимир Мудри з Канади, а наказовал о. Яков Кулич. По законченю Служби вирни и священїки трираз обишли коло церкви.
Попри присуства на Служби, вирни набрали води з Водицовей студнї, помодлєли ше, подзековали Пречистей Дїви Мариї и глєдали єй благослов.
