ДЮРДЬОВ – Вчера, 27. януара, у дюрдьовским Културно-уметнїцким дружтве „Тарас Шевченко” отримана порядна Рочна скупштина Дружтва на хторей Мирослав Барна вибрани за нового члена Управного одбору (УО), а схадзку водзел Мирослав Чакан, предсидатель Скупштини КУД „Тарас Шевченко”.
Од дзевец точкох дньового шора найзначнєйши були прилапйованє звита о роботи и финансийного звита за 2018. рок, як и програма роботи и финансийни план за тот рок.
УО Дружтва, по оцени Надпатраюцого одбору, роби у складзе зоз можлївосцами, а потримане и намаганє же би и у чечуцим року фахово руководителє секцийох поряднє робели и мали добри услови за роботу. У тим року заплановане же би ше купело електрични клавир котри помогнє у роботи вецей секцийох.
На место Геленки Корпашовей за члена у Надпатраюцим одбору вибрани Влада Тимко котри бул член УО, а место нього вигласани Мирослав Барна. На схадзки вибрани и заступнїк у АПР-у и власнїк Дружтва, на цо закон обовязує.
Под то точку Рижне предложене же би ше глєдало потримовку Националного совиту Руснацох и помогло волонтерским дружтвом и здруженьом у ришованю правних питаньох и фаховей администрациї, понеже спомнути здруженя нє маю потребни кадри.
На Скуштину пришло красне число гражданох и членох Скуштини котри после урядовей схадзки традицийно принєсли, алє и мали нагоду коштовац рижни домашнї продукти зоз меса зоз тогорочних забивачкох. На столє були понукнути гурки, колбаси, сланїна, кулен, та и швижи шкварки, як и домашнє вино и палєнка.
