НОВИ САД ‒ Наш познати дзешецбоєц Михаил Дудаш (народзени 1989. року), всоботу, 26. фабруара, у Новим Садзе означел конєц своєй активней атлетскей кариєри, после 25 рокох и вельких успихох на державних и медзинародних змаганьох.
Як гварене на святочносци з тей нагоди, национални є рекордер у дзешецбою и седембою, освоєл пейц шветово и европски припознаня, и єден є з найлєпших атлетичарох у историї сербскей „кралїци спортох”.
Бешедуюци у полней просториї Атлетского клуба „Войводина”, дзе були и його тренер Федя Камаси и тренере Ґоран Обрадович и Ференц Камаси, тиж и Асмир Колашинац, Михаил подзековал на потримовки шицким – найблїзшим, родичом и братови Иванови.
Як Михаил виявел, од дзецинства знал же ше будзе занїмац зоз атлетику, а од 1997. року потераз на стадиону препровадзел дзешатки тисячи годзини. Мило му же бул зоз Ивану Шпанович, же упознал найлєпших атлетичарох на швеце и же го тренирал Федя Камаси.
Мило му и же затримал приятельох од дзецинства, як цо Боґдан и Марко, и подзековал представнїком Городу Нового Саду и Атлетскому союзу Войводини на потримовки.
Тренер Камаси наглашел же з Дудашом були вєдно 16 роки, витворели вельки резултати, з тим же дзешец раз векши побиди, алє и пораженя дзешецбойцох у одношеню на других спортистох.
Представнїки Городу Нового Саду и Сербского атлетского союзу, Оґнєн Цвиєтичанин и Веселин Євросимович, подзековали Михаилови же достойно репрезентовал державу и город и промововал их на найлєпши способ зоз словами же його мено будзе уписане зоз златнима словами у нашим спорту.
Предсидатель Сербского атлетского союзу Веселин Євросимович на концу уручел плакету Михаилови Дудашови.
