Репрезентативци Сербиї на Балканских атлетских бавискох хтори отримани у Питештию, у Румуниї, витворели вельки успих.
Михаил Дудаш и Ведран Самац у своїх дисциплинох освоєли шампионски титули, а Асмир Колашинац освоєл стриблову медалю.
Дудаш у дзешецбою витворел прешвечлїву побиду зоз освоєнима 7 720 бодами, алє твердзи же кед досягнє праву форму годзен освоїц вецей од 8 000 боди.
– Задовольни сом зоз резултатом на тим змаганю и як сом прешол през шицки дисциплини. Резултат могол буц лєпши, алє анї тот хтори сом посцигнул нє за подценьованє. Можебуц же сом и тераз могол витвориц лєпши успих, алє сом нє мал щесца зоз хвилю, бо першого дня змаганя, падало и дул витор, цо уплївовало на дзепоєдни резултати хтори сом посцигнул. Важне же сом покалїченє санировал и же моя форма будзе максимална за змаганя на Шветовим першенстве хторе ше отрима у Амстердаму идуцого року – гварел Михаил Дудаш.
Ведран Самац на тим змаганю копию руцел 77,92 метери и тиж освоєл шампионску титулу, а Асмир Колашинац кулю руцел 20,64 метери и освоєл стрибло.
Гоч наша екипа була нєподполна на Балканских атлетских бавискох, призначела добри успих – освоєла два златни, два стриблово и два бронзово медалї. Стриблову медалю окрем Колашинца освоєла и Мария Вученович у руцаню копиї, а бронзову медалю освоєла екипа дзивчатскей штафети 4 раз 400 метери у составе: Сирмич, Чирич, Каличанин и Салашки.