РУСКИ КЕРЕСТУР – Керестурска промоция Моноґрафиї „Руски Керестур – живот и обичаї Руснацох у обєктиве фотоґрафох Будински”, як перши плод длугорочней роботи авторки др Миряни Дєкич и єй тиму, отримана вчера вечар у будинку Замок. Там тиж поставена и вистава часци вибраних фотоґрафийох котру годно опатриц нєшка и наютре од 17–20 годзин под час Фестивалу „Червена ружа”.
Красне число присутних на промоциї спред домашнїх привитал предсидатель ВО Националного совиту Руснацох Желько Ковач, а директор Заводу за културу войводянских Руснацох Сашо Сабадош представел промотерох тє. рецензентох моноґрафиї професорох др Янка Рамача и др Дюру Гардия, як и авторку др Миряну Дєкич и подзековал своїм двом предходнїком у Заводу хтори розпочали тот проєкт пред осем роками.
Рецензенти визначели важносц и велькосц того монументалного дїла и його вецейнїсту вредносц нє лєм за Керестур, алє и историю Руснацох на тих просторох, та визначели же є з вибором фотоґрафийох и толкованями на трох язикох вельки промотер Руснацох широкей явносци.
Авторка Дєкичова спомла клуючни хвильки з наставаня тей роботи, та наявела же ше проєкт диґитализованя неґативох зоз студия Бруґошових фотоґрафох предлужує и того року дзекуюци стараню Заводу за културу и обезпеченим средством, а наявела и други роботи на защити важних сеґментох з прешлосци Керестура и других руских штредкох.
З промоцию тей моноґрафиї и виставу фотоґрафийох Будински, практично почал 61. Фестивал култури „Червена ружа”.
