На соботу „Дзень Каритасу 2015”

автор зам/влв
868 Опатрене

НОВИ САД – У „Студио М” у Новим Садзе на соботу, 12. децембра, пейц владически Каритаси у Сербиї вєдно означа „Дзень Каритасу 2015”. Програма почнє на 10 годзин, з назву „Мнє сце то зробели”.

Попри викладаня главней теми и презентациї роботи хтори представя директоре владических каритасох, а искуства з нашого представи вивершни директор Каритасу Апостолского Еґзархату Янко Катона, у програми наступи и Хор „Гармония” з Нового Саду, хтори виведзе даскельо духовни композициї.

Привитни бешеди отримаю предсидатель Каритасу Сербиї – надвладика и митрополит београдски, монс. Станислав Хочевар и директор Каритасу Сербиї – протоєрей ставрофор о. Владислав Варґа.

По програми у „Студио М”,  на 12 годзин у церкви „Мена Марийового” (новосадска катедрала) будзе Служба Божа хтору будзе предводзиц надвладика Хочевар, зоз священїками обидвох обрядох.

Под час Служби, хтора будзе по горватски и мадярски, будзе шпивац и Хор „Гармония”, а у  приношеню дарох на олтар двойо млади з нашого Еґзархату у народним облєчиве принєшу нашо стардавне сладке єдло – череґи.

На шветочносц на соботу поволани представителє православней и протестантскей гуманитарней ораґнизациї, як и представителє городскей и покраїнскей власци.

На стретнуце Каритасу поволани и волонтере з наших грекокатолїцких парохийних каритасох у Бачкей и Сриме и шицки людзе добрей дзеки. Уход на програму шлєбодни.

ПОВЯЗАНИ ТЕКСТИ