РУСКИ КЕРЕСТУР – У Марийовим святилїщу у Водици 23. априла означене швето Велїкомученїка Георгия – Дзуря, пошвецене жито, а источашнє зоз тоту Службу розпочал и духовни живот у тим нашим мариянским святилїщу.
Службу служел керестурски парох о. Владислав Варґа и о. Михайло Шанта, котри споведал и причащал. У своєй казанї о. Варґа визначел же нам Исус дал нову, свою заповид котра глаши – Любце єдни других! Буц укоренєни у Богу значи мац праву любов, бо Бог то любов и то тото цо нам дава сили у нашим християнским живоце.
И попри пременлївей хвилї, шумне число вирних означели швето и пошли дому зоз пошвеценим житком.