РУСКИ КЕРЕСТУР – У Руским Керестуре на штварток, 3. новембра будзе порядна, дзевята схадзка Националного совиту (НС) Руснацох у тим зволаню, на хторей єдна з найважнєйших точкох будзе Одлука о вименки Финансийного плану НС за тот рок, односно ребаланс буджету.
На дньовим шоре и даванє думаня о вименки Финансийного плану Заводу за културу войводянских Руснацох за 2016. рок, як и даванє думаня на вименки Статуту тей институциї.
Предвидзене же будзе принєшена и Одлука о утвердзованю традицийних назвох општинох и населєних местох на руским язику, Одлука о додзельованю позарядовей стипендиї, та принєшени Правилнїк о реґулованю менованя почесного члена НС Руснацох.
Ґу тому, на дньовим шоре схадзки и потвердзованє осем одлукох Вивершного одбору Совиту, та звит з путованя до Свиднїку.
Дзевята схадзка НС Руснацох на штварток будзе на 17 у просторийох Совиту у Замку.