КОЦУР – У просторийох Добродзечного огньогасного дружтва (ДОД) у Коцуре вчера орґанизована програма з нагоди Шветового дня зменшованя ризику од природних катастрофох, у чиїх рамикох бул и подобови конкурс, огньогасна вежба, а привитани и госци.
На подобовим конкурсу участвовали дзеци з коцурского Оддзелєня „Герлїчка” ПУ „Бошко Буха” з Вербасу, а найкасши рисунки достали и награди. На преподаваню и огньогасней вежби були и школяре ОШ „Братство єдинство”, а огньогасци указали свою схопносц у гашеню огня. З надпатрунком огньогасцох, школяре и сами гашели мали огень з огньогасним апаратом.
Окремни госци на тим збуваню були представителє Каритасу Сербиї Йована Лончаревич и Елемир Джуджар, понеже у рамикох Каритасового проєкту за превенцию елементарних нєпогодох коцурскому ДОД обезпечени средства за купованє дески за одруцованє шнїгу. За тото ДОД влонї конкуровало до Каритасу Сербиї, а донацию обезпечи Каритас Австриї.
Представянє активносцох ДОД, презентацию опреми и огньогасну вежбу вчера провадзели и член Општинскей ради Општини Вербас задлужени за комунално-квартельни дїялносци и привреду Душко Чутило, предсидатель Месней заєднїци (МЗ) Коцур Желько Бєлан и секретарка МЗ Єлена Бесерминї.
