ДЮРДЬОВ – Вчера, 6. новембра вечар, у грекокатолїцкей церкви Рождества Пресвятей Богородици у Дюрдьове отримани Концерт духовней музики, з хторим дюрдьовски Хор „Розанов”, основани при тей церкви, означел 20-рочнїцу постояня. Попри ювиланта, на Концерту наступели Хор „Гармония” и Хор Успенскей церкви „Стеван Дечански”, обидва з Нового Саду.
З Хором „Розанов” дириґовала Татиана Барна, Хором „Гармония” Весна Кесич Крсманович, а з Хором Успенскей церкви „Стеван Дечански” Тамара Петиєвич.
Госцох привитал и програму представел о. Борис Холошняй з Австриї, а по законченю Концерту, у просторийох КУД „Тарас Шевченко” домашнї з Хору „Розанов” присутним прейґ видео-биму представели кратши прегляд фотоґрафийох з їх госцованьох.
Нововибрана предсидателька Хору „Розанов” Любка Тиркайла дириґентом госцуюцих хорох уручела „Розанов” комапкт-диск и Зборнїк богослужебних композицийох карпаторуского розшпиву.
На Концерту бул присутни наш владика кир Георгий Джуджар, представителє Општини Жабель, коцурски парох о. Владислав Рац, дюрдьовски православни парох о. Петар Дюкич, представителє совиту Месней заєднїци Дюрдьов, велї парохиянє и госци з других местох.