ДЮРДЬОВ – Вчера, на Дзень женох, КУД „Тарас Шевченко” у Дюрдьове орґанизовал традицийни Осмомарцовски концерт, на хторим, попри домашнїх, участвовали и дзецински секциї КУД „Яким Ґовля” з Миколошевцох, з Горватскей.
Сала Дружтва була полна з патрачами, а вельочислени учашнїки – наймладши члени дюрдьовского Дружтва, школяре нїзших класох ОШ и дзеци з дзецинскей заградки – шицким женом їх дзень повинчовали зоз шпиванками, музику, танцами и гумористичнима скечами, а за наступ их пририхтали їх виховательки, учительки и уметнїцки руководителє.
У мено госцох з Миклошевцох, присутних на концерту привитала уметнїцка руководителька у КУД „Яким Ґовля” Ксения Лїкар и визначела же членом Дружтва барз мило же су часц того концерту, односно же и у Дюрдьове можу указац свою роботу.
Пририхтованє за Осмомарцовски концерт почало дзень пред тим, всоботу дополадня з уж традицийну роботню за младих членох КУД „Тарас Шевченко”, на хторей и того року виробели рижни прикраски за сценоґрафию, а члени КУД зготовели и погосценє за друженє после концерту.
