СУБОТИЦА – У грекокатолїцкей парохиї у Суботици 29. децембра у Францисканскей церкви, о. Михайло Малацко служел остатню службу у тим року, хтора самим тим була и крачунска. Дух Крачуна прейґ колядох принєсол Хор катедрали св. Миколая и Дому култури Руски Керестур котри шпивал и у служби, а под руководством Лидиї Пашо.
По законченю Служби Божей Миколай наймладшим Суботичаньом подзелєл пакецики у хторих ше, окрем лакоткох, нашла и по єдна кнїжка за дзеци Новинско-видавательней установи „Руске слово”. Пакецики за дзеци обезпечело Дружтво Руснацох у Суботици.
Хор катедрали св. Миколая и Дому култури Руски Керестур истого вечара на 19 годзин отримал Крачунски концерт у Францисканскей церкви. Суботичаньом ше представели зоз штирома колядами.
