РУСКИ КЕРЕСТУР − На порядней Рочней скупштини ЗСР ,,Колякˮ котра отримана, внєдзелю 27. януара, у Руским Керестуре на Лонґове, винєшени звит о активносцох у прешлим року и планох за тот, як и финансийни звит за 2018. рок.
На Скупштини предсидатель ЗСР ,,Колякˮ Михайло Пашо наглашел же Здруженє ма 125 членох – сениорох, ветеранох и инвалидох, як и 50 членох пионирох, чийо число того року звекшане за скоро два раз вецей як прешлого року.
Попри числених членох, Скупштини присуствовали Владимир Олеяр предсидатель Совиту Месней заєднїци (МЗ), директор ЯКП ,,Рускомˮ Иґор Фейди и числени спонзоре котри помагаю Здруженє векшином з валалу.
Од активносцох у прешлим року визначени еко-проєкт з котрим конкуровали до Општини Кула, розчисцовали и нєлеґалне шмециско при теметове, а там направени рампи за огранїчованє преходу векших превозкох. Потим робели на своїм лєтнїковцу на базену, орґанизовали и малу школу рибарства за наймладших, Михайло Костелник и Мирко Фекете викладали о файтох риби у наших водох, а дипл. еколоґ Светлана Няради викладала о очуваню околїска.
Рибаре участвовали и на манифестациї „Днї керестурскей паприґи”, помогли на роботней акциї ушорйованя теметова, попри тих числених активносцох, ЗСР „Коляк”у прешлим року бул орґанизатор двох змаганьох – „Лапанє на дуґов” у юнию и традицийней „Чукияди” у октобру з нагоди Дня ошлєбодзеня Керестура од фашизму.
Були орґанизаторе змаганя у вареню рибового паприґашу, дзе участвовали 14 екипи, а у плану им же би то постала традиция. Члени ЗСР „Коляк” участвовали на змаганю у Миклошевцох и у Дюрдьове на змаганю котре отримане у рамикох Спортских бавискох „Яша Баков”. Пред сам конєц рока, у децембру порибели беґель зоз 700 кґ младей риби, а то шицко у рамикох порибйованя котре орґанизовало ЯП „Води Войводини”.
Предсидатель Здруженя Михайло Пашо визначел скромни, алє позитивни финансийни план, як и добре сотруднїцтво зоз шицкима здруженями у валалє, и плани за орґанизованє и участвованє на истих змаганьох и одход на кампованє на Дунай. Тиж ше представя и на манифестациї „Днї керестурскей паприґи” тим року. У плану и написац проєкт за полєшованє керестурского лєшику котри будзе витрозащитни пояс валалу, и участвованє на шицких волонтерских акцийох котри буду орґанизовани у валалє.
Предсидатель ЗСР Пашо подзековал Управному одбору на добрим сотруднїцтву и потримовки, як и валалским здруженьом – Конїцкому клубу „Русин”, Здруженю продуковательох паприґи „Капсикум анум” и Добродзечному здруженю огньогасцох.
Як и шицким котри допринєсли їх активносцом и котри их потримали финансийно, медзи нїма Општина Кула, Месна заєднїца Руски Керестур, ЯКП „Руском”, тапетариї „Комфорт” и „Тина ентериєри”, подприємство „Електромонтажа”, „Фреш маркет”, предавальня рибарскей опртеми „Тадич” з Кули, рибалови „Русин” и „Еделински”.
Членарина у Здруженю и надалєй остала иста − 500 динари, а безплатна є за пионирох. Цени риболовних допущеньох звекшани − 7 000 порядне, а 3 500 динари пензионерске. Членарину и допущенє мож уплациц нєдзелями од 10 до 12 годзин у просторийох ЗСР, як и пондзелками од 10 годзин у друкарнї „Пашо принт”.
