Отримана XVI схадзка Скупштини општини Вербас

304 Опатрене

ВЕРБАС – Вчера, 30. юния, отримана XVI схадзка Скупштини општини Вербас, а пред одборнїками ше нашол дньови шор зоз 16 точками. Початку схадзки присуствовали 24 од 36 одборнїки.

По другей точки дньового шору розпатрани Предклад одлуки о закончуюцим рахунку буджету општини Вербас за 2021. рок. Тоту одлуку обгрунтовал предсидатель Општини Вербас Предраґ Роєвич, котри визначел же у прешлим року општински буджет приходовал вкупно милиярду и 569 милиони динари. Витворени суфицит од скоро 41 милион динари, а найвецей приходи локална самоуправа витворела од порциї на приходи и порциї на заробки, як и од комуналних таксох и трансферох од других уровньох власци. Зменшани приходи котри општина витворйовала од польопривреди и таксох на защиту животного стредку, цо условело же би ше часц средствох планованих за инвестициї преунапрямела за других буджетских хасновательох. Порцийни приходи по перши раз прешлого року були понад єдней милиярди динари. На Предклад одлуки о закончуюцим рахунку за 2021. рок пригварки винєсли одборнїки опозицийней одборнїцкей ґрупи Ошлєбодзме Вербас. Шеф тей одборнїцкей ґрупи Драґан Стиєпович критиковал праве нєдостаток инвестицийних укладаньох у предходним периоду, цо виволало дальшу полемику на тоту тему.

Потим одборнїки розправяли о Предкладу Дїловнїка о вименки и дополнєню Дїловнїка Скупштини општини Вербас, як и о Предкладу одлуки о приношеню Програми одцудзеня будовательней жеми у явней власносци у општини Вербас за 2022. рок.

Як пията точка дньового шору, розпатрани Предклад одлуки о явних паркиралїщох з котрим предвидзене же би ше ришело проблем паркираня превозкох у центру Вербаса. Од 1. октобра предвидзене уводзенє паркинґ зонох и наплацованє за паркиранє превозкох, як и закуп паркинґ местох.

Усвоєни и Предклад одлуки о усвойованю информацийох о ступню ускладзеносци планованих и реализованих активносцох з програми дїлованя явних подприємствох чий снователь општина Вербас за период од 1. януара по 31. марец 2022. року, як и два одлуки котри ше одноша на Явне подприємство за будовательну жем, вибудову и драги „Дирекция за вибудову” – у ликвидациї.

З векшину гласох вигласани и Предклад одлуки о приношеню мирох за превенцию насилства и злоставяня у основних и стреднїх школох на териториї општини Вербас. Предклад одлуки о вименкох и дополнєньох Одлуки о окончованю комуналних дїялносцох тиж достал потримовку векшини одборнїкох, як и Звит о роботи Правобранїтельства општини Вербас за 2021. рок и Предклад ришеня о способу окончованя длужносцох.

На схадзки пришло и до розришеня потерашнього окончователя длужносци директора ЯКП „Стандард” Вербас Мариї Милунович, а на исту длужносц менована Наташа Алексич.

Схадзка Скупштини општини Вербас закончена зоз точку Предклади Комисиї за кадрово, административни питаня и роботни одношеня, з котру, медзи иншим, пришло и до вименки у руководству Туристичней орґанизациї општини Вербас, на функцию о.д. директора меновани Михайло Киш. На концу вименєни и состав школских одборох у векшини основних и стреднїх школох у општини Вербас.

 

ПОВЯЗАНИ ТЕКСТИ