ВЕРБАС – Роботне цело за безпечносц младих Главней (Кровне) орґанизациї младих Сербиї (КОМС) розписало конкурс за финансованє локалних инициятивох за злєпшованє безпечносци младих и дзвиганє безпечносней култури младих у 12 городох и општинох Сербиї. Єдна з општинох у хторей отворена поволанка и општина Вербас.
Конкурс ше витворює у рамикох проєкту „Подмладозванє! – Нови идеї младих за лєпше положенє младих”, з финансийну потримовку Министерства за младеж и спорт Републики Сербиї. Поволанка отворена по 30. януар.
Участвовац маю право млади медзи 15 и 30 роки, а на конкурс ше можу явиц здруженя младих, здруженя за младих и нєформални младежски ґрупи составени з найменєй пейц членох, як цо то школярски и студентски парламенти, рижни младежски секциї и други ґрупи младих з подруча Вербасу, Зомбора, Суботици. Нового Саду, Беоґраду и ище седем городох у Сербиї.
Креативна акция, лєбо инициятива, треба же би була у рамикох єдней з шейсц темох: позарядово ситуациї, еколоґийна безпечносц, здравствена безпечносц, насилство, безпечносц у транспорту и безпечносц на интернету.
Активносци би мали буц витворини од 6. фебруара по 6. марец 2016. року, а деталнєйши информациї о конкурсу, условийох участвованя, мож пренайсц на сайту www.koms.rs