ЖАБЕЛЬ – У рамикох проєкту „Партиципация и активизем младих“, Канцелария за младих Општини Жабель од 1. мая по 1. децембер у шицких штирох местох општини витвори седем активносци. Так 30. мая у Жаблю будзе отримани турнир у кошарки, початком юния роботня за писанє роботней биоґрафиї, тиж у Жаблю, а од 2. по 5 юлий будзе Едукативни камп у природи у Чуроґу.
Млади концом юния буду участвовац и на реґати у Чуроґу, у авґусту у Дюрдьове будзе турнир у спортским лапаню риби, а едукативни роботнї о чкодлївосци догану у перших трох мешацох нового школского року буду отримани у шицких основних и штреднїх школох у општини.
Активносци буду витворени у сотруднїцтве зоз Спортским союзом Општини Жабель, а орґанизаторе поволую младих зоз жабельскей општини же би ше приявели за участвованє у нїх, на телефони: 064/814-45-37 и 210-22-88.
Цали проєкт Министерство младежи и спорту потримало зоз 600 000 динари.