НОВИ САД – И того року Екуменска гуманитарна орґанизация орґанизує заєднїцку екуменску молитву за Шветови молитвови дзень, хтора будзе на пияток, 4. марца, у Словацкей евагелистичней а. в. церкви у Новим Садзе.
Тогорочну молитву вєдно написали шестри зоз Анґлиї, Велса и Сиверней Ирскей. Тема молитви – „Дам вам будучносц и надїю”, а єй фундамент на стиху зоз кнїжки пророка Єремиї 29꞉11. През приповедку о прегнанстве и рабстве юдейского народу у Вавилону, присутни ше задумаю над сучаснима формами рабства, гарештанства, виключносци. Феномен експлоатациї, расного нєцерпеня и фамелийного насилства присутни и у сучасним британским дружтве.
Прето жени ширцом швета на пияток, 4. марца, ше буду модлїц за Вельку Британию, алє и за цали швет у хторим би любели видзиц вецей правдивосци, вецей радосци и надїї.
Жени зоз ШМД зоз Нового Саду сердечно поволую на пияток, 4. марца, на 17 годзин, до Словацкей евангелистичней а. в. церкви, Улїца Вука Караджича 8 у Новим Садзе, же би вєдно зоз милиони женми того дня модлєли за лєпшу будучносц и нову надїю.