НОВИ САД – Скупштина Автономней покраїни Войводини (АПВ) вовторок, 29. децембра прилапела буджет за 2016. рок, хтори виноши 57,8 милиярди динари. Буджет будзе унапрямени на польопривреду, очуванє проєктох, на злєпшанє квалитету живота и на потримовку трецому дзецку у фамелиї.
Предсидатель Покраїнскей влади Боян Пайтич виявел же Войводина тераз ма вельо менєй як седем одсто з републичного буджету, кельо єй ґарантоване з Уставом. Визначел и же ше буджет Войводини зменшує уж три роки, а до теди роснул.
Покраїнска посланїца Лиґи социялдемократох Войводини (ЛСВ) Мая Седларович оценєла же Сербия барз централизована держава у хторей ше Войводину з рока на рок вше менєй финансує. Гварела же векшина средствох у буджету то трансферни средства и же ше перши раз до ньго учушлює средства хтори анї нє дойду до АПВ, як цо то директни даваня з републики локалним самоуправом, лєбо такса за покраїнски явни сервис. Седларовичова наведла же република длужна покраїни 240 милиярди динари.
Посланїки Сербскей напредней странки (СНС) у Скупштини Войводини нє гласали за предложени буджет, а посланїк Миленко Йованов зоз СНС оценєл же буджет за 2016. рок нєлоґични, насампредз прето же за дотациї за явни сектор наменєни вецей средства як за политику обезпечованя роботи.