Гоч нє приходза нови миґранти до општини Шид, прешлого тижня у трох дочасових прилапююцих центрох и далєй були змесцени коло 700 особи. Вони нєпреривно доставаю поживу, здравствену защиту, средства за гиґиєну, шмати и обуй.
Без огляду же у тей хвильки нєт нових миґрантох, хтори на драги ґу Заходней Европи преходзели през општину Шид, на подручу тей погранїчней сримскей општини миґранти и далєй дочасово змесцени. Их число ше меня, а по остатнїх податкох, прешлого тижня, их було коло 700 у трох дочасових прилапююцих центрох. Дзеци, жени и хлопи змесцени на Принциповцу, блїзко при гранїци з Републику Горватску, потим у будинку дакедишнєй клальнї и месовей индустриї „Срим”, просто гайзибанскей станїци у Шидзе, а тиж су змесцени и у прилапююцим центре у дакедишнїм мото-готелу при Адашевцох.
Як гваря у Червеним крижу у Шидзе, вони и далєй нєпреривно помагаю миґрантом и даваю им єдзенє, средства за гиґиєну и шмати и обуй.
– Шицку помоц хтору достанєме прейґ Червеного крижу Сербиї розподзелюєме миґрантом спрам дньових потребох на терену. Тиж и далєй активни и други гуманитарни орґанизациї як цо то „Човеколюблє”, потим Каритас хтори помага од самого початку миґрантскей кризи, вец гуманитарна орґанизация „Ворлд вижн”, Фондация Ани и Владу Дивца и други. Нєодлуга миґранти достаню и окремни идентификацийни документи з фотоґрафию подобни як особни карточки же би ше их могло идентификовац, док пребуваю на тим подручу – гвари Ивица Йович, секретар Червеного крижу у Шидзе.
Миґранти нєпреривно маю и здравствену защиту. Як нам гварел др Крсто Куреш, директор Дома здравя у Шидзе и главни координатор медицинских службох хтори задлужени за медицинску помоц, окрем екипох Дома здравя миґрантом помагаю и други здравствени орґанизациї и так будзе потамаль док миґранти буду на тим подручу.
Од самого початку миґрантскей кризи и Каритас помага миґрантом. Мирислав Мохнацки хтори роби як вожач комби превозки и задлужени є за дистрибуованє помоци гвари нам же помоц, по потребох, миґранти и далєй доставаю.
СУЧАСНА КУХНЯ
По штредок априла требало би буц закончене адаптованє просторийох и монтированє опреми новей, сучасней Народней кухнї у Шидзе, а источасно, окрем за социялно угрожени особи, пожива ше будзе рихтац и за миґрантох.
Кухня будзе у дакедишнєй польопривредней апатики, же би ше ю адаптовало помагаю иножемни донаторе прейґ Червеного крижу Сербиї. Адаптованє кошта коло 25 000 еври, а єдла ше годно рихтац за коло 700 хасновательох.