НОВИ ПАЗАР – Предсидатель Вивершного одбору Националного совиту (НС) Руснацох Желько Ковач и предсидателька Одбору за образованє Совиту Мелания Римар стреду, 13. юлия, присуствовали на схадзки Координациї НС-ох, хтора отримана у шедзиску НС Бошнякох у Новим Пазаре, а зоз схадзку предшедовал предсидатель НС Бошнякох др Сулейман Уґлянин.
На схадзки Координациї присуствовали представителє 15 з 19 НС-ох у Сербиї (нє були представителє греческого, словенацкого, немецкого и влашского совиту) и завжате заєднїцке становиско коло упитнїку ОЕБС-у и Беоґрадского центру за людски и меншински права, з назву „Национални совити националних меншинох: анализа правного рамика”, як часц проєкту потримовки державним орґаном у процесу вименкох меншинского законодавства.
Як Рутенпрес дознава од Желька Ковача, заключене же би такой по формованю новей Влади Сербиї представителє Координациї НС-ох нащивели ресорни министерства, а окреме министерство просвити, понеже, як поведзене, у тей обласци и надалєй єст найвецей почежкосци кед слово о образованю на язикох меншинох у Сербиї. Вязано за тоту обласц принєшени и вецей заключеня, односно проблеми хтори потребне ришовац.
Тиж так, при Влади, односно министерствох ше будзе инсистовац же би шицки уровнї власци, а насампредз локални, сполньовали свойо законски обовязки и почитовали статути своїх локалних самоуправох кед слово о националних меншинох у своїх штредкох, односно почитовали обовязки хтори виходза з права на службене хаснованє язика и писма. Пре сполньованє тих законских обовязкох, на уровню держави потребне одредзиц критериюми и санкциї.
Ґу тому, Координация будзе инсистовац же би уж того року зажил Буджетни фонд за национални меншини на уровню держави, хтори убудовани до Зкона о националних совитох, алє ше го вообще нє применює.
