РУСКИ КЕРЕСТУР – На основи консултацийох зоз сосновательом, концом прешлого тижня перше члени Одбору за културу, а потим и Националного совиту Руснацох гласали о предкладаню кандидатох за членох Управного одбору (УО) и Надпатраюцого одбору (НО) Заводу за културу войводянских Руснацох (ЗКВР), понеже були предложени тройо нови кандидати за УО и єдна нова кандидатка за НО Заводу.
Електронска схадзка Одбору за културу отримана од 5. по 7. април и з векшину гласох – 10, односно 11, прилапене нове предкладанє, а на Електронскей схадзки НС, отриманей 7. и 8. априла, нове предкладанє прилапене з 11 гласами „за”, док 8 члени нє гласали.
На основи того, НС Покраїнскей влади предложи 12 кандидатох за членох УО ЗКВР, а буду меновани 9. За предсидателя УО Заводу предложена Анамариа Регак, а за членох Любица Отич, Сашо Сабадош, Йоаким Стрибер, Иван Канюх, Лидия Пашо, Деян Загорянски, Дюра Винаї, Михаил Римар, Микола Шанта, Ваня Дула и Деян Бобаль.
За предсидателя НО Заводу буду предложени Иван Гарди, а за членох Татяна Симунович Чулум, Гелена Бабич и Емилия Чизмар. Покраїнска влада менує троїх членох до НО ЗКВР.