НОВИ САД – У Руски културним центре у Новим Садзе, вовторок, 15. децембра, отримана роботня за младих пре їх упознаванє зоз структуру и роботу Националного совиту (НС) Руснацох, окреме з його Роботним целом за младеж. Роботню орґанизовали члени Роботного цела за младеж Соня Гудак и Иван Канюх, а на сходзе присуствовал и член НС Мирослав Кевежди.
Роботня була отвореного типу, та нащивителє могли активно участвовац и поставяц питаня, алє и дац свойо предкладаня, лєбо зауваги.
Гудакова и Канюх на нєформални и креативни способ приблїжели тото фахове цело младим, алє представели и структуру Националного совиту, його компетенциї, обовязки и задатки.
Тиж так, представели и членох и тогорочну роботу Роботного цела за младеж НС, з акцентом на толкованю проєктох. Поволали шицких младих же би писали цо вецей проєкти и конкуровали, надпоминаюци же им вони дзечнє помогню.
Нащивителє були наисце заинтересовани за винєшену тему, та поведзене же подобни роботнї буду орґанизовани и убудуце.
У предлуженю вечара присутних забавяли музичаре Саня Полдруги и Кристиян Няради.
