КОЦУР – Пондзелок 13. мая у Предшколскей установи „Герлїчка” у Коцуре отримана друга схадзка представительох Националного совиту Руснацох зоз родичами дзецох котри ходза лєбо треба же би почали ходзиц до рускей або мишаней ґрупи.
Спред НС Руснацох, схадзки присуствовали предсидатель Вивершного одбору (ВО) Желько Ковач, предсидателька Одбору за образованє Мелания Римар, член истого Одбору Ксения Бенце, помоцнїк директора Предшколскей установи „Бошко Буха” Вербас Небойша Дешич, виховательки котри робя у руских и мишаних ґрупох, як и учительки Основней школи „Братство єдинство” з руских оддзелєньох, вєдно зоз школску библиотекарку Ксению Медєши.
Як визначел помоцнїк директора Дешич, зоз спатраньом приявох за упис шлїдуюцого школского року, заключене же нєт достаточне число приявени дзеци анї за руску ґрупу, анї за мишану.
– Як ришенє того проблему, даваме предклад же би ше формовала ґрупа хтора би облапяла дзеци од 3 роки по предшколски возрост. Таку ґрупу маме на мадярским язику, и уж 3 роки то барз добре функционує. Прирухтує ше окремни програм за дзеци од 3 и 4 роки, окремни за дзеци од 5 роки, а тиж так и за предшколски возрост, так же дзеци анї на єден способ нє очкодовани цо ше дотика воспитно-образовней роботи – гварел Дешич.
Предсидатель ВО Желько Ковач и предсидателька Одбору Мелания Римар здогадли присутних родичох же Национални совит ма правилнїк котри реґулує виплацованє стимулациї од 5 000 динари мешачно за предшколски дзеци, як и за першокласнїкох. Тиж визначели же барз важне ришиц тот проблем и найсц ришенє хторе будзе найлєпше за шицких – и за кадри, и за дзеци, а и за родичох.
– Ми и у обовязки, а и жадаме на даяки способ ошмелїц и родичох же би уписовали дзеци до руских ґрупох. З потримовку предшколскей установи, родичох, Националного совиту, шицки вєдно найдземе ришенє – оптимистично заключел Ковач.
По консултованю, принєшена одлука же би виховательки пренєсли другим родичом предклад о формованю такей ґрупи и зробели анкету по конєц того тижня.