Преложене отримованє „Коцурскей чутки 2021” за децембер

автор ол. русковски
347 Опатрене

КОЦУР – У просторийох Дома култури у Коцуре внєдзелю, 7. новембра, отримана схадзка Орґанизацийного одбору Медзинародного фестивалу гумору и сатири „Коцурска чутка 2021”.

Зоз схадзку предшедовал предсидатель Културно-просвитного дружтва ДОК – Нови Сад проф. др Михайло Фейса, а попри симпатизерох Дружтва, присутни бул и пастор Євангелскей церкви Александар Суботин и професорка класней настави Славица Чельовски зоз Основней школи „Братство єдинство”.

Найвецей бешеди на схадзки було о наиходзацим Фестивалу, планованю програми, о розписаних конкурсох, як и о анимированю дзецох, младих, алє и старших же би ше явели на числени конкурси. Окрем того, на спомнутей схадзки одлучене же Медзинародни фестивал гумору и сатири „Коцурска чутка 2021” нє будзе отримани остатнього викенду у новембру як було плановане, алє отримованє  преложене за други викенд у децембру.

Здогаднїме, перши конкурс на котри ше шицки заинтересовани можу явиц то музични конкурс и одноши ше на змаганє у шпиваню гумористичних шпиванкох. Мож шпивац а капела, наживо або онлайн (зоз посиланьом видео-клипу), соло, дуо або трио, караоки, на матрицу и подобно, гварел др Фейса, а аудиция ше отримує каждей нєдзелї од 18 по 22 годзин у Дому култури Коцур.

Други конкурс театрални и одноши ше на найуспишнєйше виведзени скеч або стенд-ап наступ. Скечи/стенд-апи мож послац онлайн (зоз посиланьом видео-клипу).

Треци подобови конкурс, на теми: 1. Ламачка 2021; 2. Гумористично-сатирична манифестация „Коцурска чутка”. Роботи мож придац Орґанизацийному одбору.

Штварти конкурс ше одноши на змаганє у правеню чардаку з чуткох. Пре пандемийну ситуацию, змаганє у тим традицийним дзецинским бависку отрима ше даскельо днї пред Централну манифестацию, а публики будзе приказане на видео-биму у Велькей сали Дома култури Коцур на Централней манифестациї и, як визначел проф. др Михайло Фейса, на шицких дружтвених мрежох.

Пияти конкурс ше одноши на традицийне змаганє „Коцурскей чутки” – на вибор найдлугшей чутки тогорочней ламачки. Чутки-кандидати мож принєсц до Дому култури, а меранє чуткох тиж будзе приказане на видео-биму у Велькей сали Дома култури и дружтвених мрежох.

Найлєпших на каждим зоз пейцох обявених конкурсох виберу одвитуюци фахово жириї, а награди буду уручени на Централней манифестациї у новим термину, 12. децембра, гварел на концу др Фейса.

ПОВЯЗАНИ ТЕКСТИ