ПРЕШОВ – Грекокатолїцки священїк о. Юрай Градош обявел драгоцини документ од 24. априла 1646. року, хтори ше одноши на Ужгородску унию. Дотераз фаховци тримали же акт о Ужгородскей униї нє бул документовани, цо значи же нє бул направени нїяки запис о єй заключеню, а обява найдзеного документу то демантує.
Явносц з найдзеним документом нєдавно упознал портпарол грекокатолїцкей Прешовескей архиепархиї Любомир Петрик, а як гварел, дотераз бул познати лєм познєйши документ од 15. януара 1652. року, так же терашнї Церква трима за єдинствену обяву.
– На найдзеним документу латински текст под хторим шлїдза 63 подписи священїкох. О. Градош драгоцини документ пренашол 4. мая, та є прето ище у фази випитованя, а блїзши информациї по историйним пренаходку того драгоциного документа буду обнародовани у найблїзшим чаше у фаховей литератури – сообщел Петрик и констатотавал же тот документ ище драгоцинши, бо є пренайдзени у чаше кед тих дньох означена 370-рочнїца Ужгородскей униї.
Ужгородска уния представяла формални акт о обнавяню полного церковного зєдинєня медзи церкву византийского обряду у Мукачевскей епархиї, до хторей спадала и територия терашнєй Грекокатолїцкей церкви у Словацкей, з Католїцку церкву.
Як наводза историчаре, тото ше збуло 24. априла 1646. року у замку Друґетох у Ужгородзе, дзе були присутни 63 грекокатолїцки священїки и яґерски бискуп Юрай Якушич.
О. Юрай Градош, котрому ше удало пренайсц тоту грамоту, пририхтує публикацию у едициї „Грекокатилїцка церква у Словацкей”, хтора виходзи од 2012. року, а будзе закончена у 2018. року, з нагоди 200-рочнїци наставаня грекокатолїцкей Прешовскей епархиї. Источашнє то и його докторска дисертация.
