БЕОҐРАД – Нєшкайше швето св. Кирила и Методия (по юлиянским календаре) и свой Кирбай, беоґрадски грекокатолїки преславели всоботу, 21. мая, у церкви у Вишеґрадскей улїци. Кирбай преславени зоз Службу Божу, хтору предводзел декан сримски и парох шидски о. Михайло Режак, а сослужовал домашнї парох о. Владислав Варґа.
– Од святих Кирила и Методия можеме научиц як ше мож християнски приблїжиц ґу людзом на єдноставни и розумлїви способ. Кед отвориме свойо шерца, вец и Бог помага, та мож зробиц вельки дїла – гварел у казанї о. Режак, а парох о. Варґа на Кирбаю привитал коло 60 присутних.
– На тим Кирбаю маме людзох рижних нацийох, та и вирох, з Беоґраду, Шиду, Сримскей Митровици и Нового Саду, а шицки славиме Бога и святих и сотрудзуєме медзи собу, як нас учели и св. Кирил и Методий – наглашел о. Варґа.
По Служби и Молебену любезни домашнї порихтали аґапе на хторим ше грало, танцовало и шпивало, чому допринєсла и жридлова ґрупа зоз Шиду зоз свою културно-уметнїцку програму.