НОВИ САД – Скупштина Войводини вчера прилапела буджет АП Войводини за 2015. рок, хтори плановани на вецей як 62 милиярди динари, и у одношеню на тогорчни, менши є за 2,3 милиярди динари, цо коло 3,6 одсто тогорочного буджету. Як потолоковане на схадзки, буджет зменшани пре применьованє Закона о зменшаню заробкох.
У складзе з можлївосцами, у 2015. року плановани и капитални инвестициї и предлужованє финансованя мирох за унапредзованє привредного амбиєнту и звекшованє числа занятих. Средства за директни капитални укладаня, або як потримовка општином и другим институцийом у Войводини, виноша вецей як 15 милиярди динари.
Дефицит у буджету за 2015. рок плановани на 5,4 милиярди динари, будзе покрити зоз шпорованьох, а задлужованє АП Войводини, хторе тиж будзе зменшане за вецей як 100 милиони динари, нє будзе уплївовац на дефицит. Задлужованє наменєне за набавку опреми до здравствених институтох у Сримскей Каменїци.
За буджет гласали 68 покраїнски посланїки шицких странкох хтори творя векшину у войводянским парламенту – Демократскей странки, Лиґи социялдемократох Войводини и Союзу войводянских Мадярох. Посланїки опозициї нє гласали за буджет и наволали го же є нє розвойни, алє „трошни”.