ВУКОВАР – Стреду, 30. марца, у орґанизациї Союзу Русинох Републики Горватскей, у Спомин доме Лавослава Ружички у Вуковаре отримана промоция кнїжки „Страданє Руснацох у Отечественей войни 1991/92”, автора Миколу Папа.
Пред промоцию орґанизована вистава з назву „Город Вуковар з околїском у Отечественей войни”, хтора приказує живот Руснацох у вибеженстве, знїщени материялни добра, фраґменти з културного живота у вибеженстве, як и обставини у яких ше жило, людзох котри страдали и тих котри були повиганяни зоз своїх обисцох.
На вистави и промоциї кнїжки присуствовали представителє Городу Вуковар, руски дружтвени и политични активисти и роботнїки, учашнїки Отечественей войни, а шицких привитала предсидателька Союзу Русинох РГ Дубравка Рашлянин.
Промотор кнїжки бул др Томислав Мишир, а о самим друкованю бешедовала редакторка Вера Павлович. Рецензент кнїжки, полковнїк у пензиї Иван Ґрчич бешедовал о страданю националних меншинох у войни, алє и о Руснацох котри були у його бриґади у Винковцох.
Юрай Бичанич пречитал мена шицких котри смертельно страдали, забитих, лєбо скапаних, а др Мишир наглашел же, у одношеню на число Руснацох у Горватскей, утрата Руснацох така велька же нє мож анї задумац шицки єй пошлїдки. З числа пописаного жительства рускей народносци у войни страдали коло 3 одсто.
Сам автор Микола Пап подзековал шицким сотруднїком на твореню кнїжки, а винєсол и дзепоєдни почежкосци з хторима ше стретал, насампредз у доходзеню до ушорених податкох, та часто мушел хасновац особни шведоченя.
Кнїжка друкована з допомогу Совиту за национални меншини РГ, а видаватель Союз Русинох РГ. Кнїжку мож пречитац на веб-бокох Союзу Русинох РГ, на линку https://www.savezrusina.hr/fileadmin/doc/Knjige/Stradanje_Rusina_u_domovinskom_ratu_1991-92.pdf.