РУСКИ КЕРЕСТУР – У Доме школярох, при Основней и штреднєй школи „Петро Кузмяк”, успишно отримана часц проєкту „Гласам за родну ровноправносц”, чий ношитель Здруженє женох „Байка” з Руского Керестура.
Проєкт витворени у сотруднїцтве зоз Совитом за родну ровноправносц Општини Кула, а циль му защита и промоция єднаких можлївосцох при младих возросту од 16 по 19 роки.
Прето у септембру отримани три роботнї у трох штреднїх школох, у Економско-тарґовецкей и Штреднєй технїчней у Кули и прешлого вовторку у керестурскей „Петро Кузмяк”, и вкупно у нїх участвовали 40 школяре, найвецей у Керестуре.
Фахову часц проєкту тє. едукацию о теми и роботнї водзела Зорица Омерович Ачански, котра и членїца Байки и предсидателька Совиту за родну ровноправносц, у керестурским Доме школярох орґанизацийно помогла Любица Няради, а присутни були и представительки „Байки” на чолє з предсидательку Славицу Катона.
Проєкт „Гласам за ровноправносц” на конкурсу Заводу за ровноправносц з Нового Саду достал вецей як 150.000 динари.