БЕОҐРАД – По конєц рока будзе ришени проблем длуствох домох здравя и апатикох, пре хтори им рахунки блокировани, а тоти длуства буду мушиц виплациц локални самоуправи понеже вони одвичательни за доми здравя, гварел министер здравства Златибор Лончар, а преноша медиї. Як нєдавни писал Рутенпрес, медзи здравственима установами хтори маю длуство за лїки и Дом здравя Кула.
За ришованє проблему длуствох оформени тими у хторих представителє Министерства за державну управу и локалну самоуправу, финансийох, привреди и здравства. Як гварел министер Лончар, доми здравя и апатики хторим блокировани рахунки достали упитнїки прейґ хторих даю одвити прецо ше нашли у такей ситуациї.
Републични фонд за здравствене осиґуранє и Министерство здравства давали пенєж за функционованє тих здравствених установох, алє є нє трошени наменски, гварел Лончар и додал же длуства буду мушиц вимириц локални самоуправи, прето же вони виберали директорох тих установох, надпатраюци и управни одбори.
– Думам же апатики войду до партнерства з професийним менаджментом. Длуство нє прейдзе до явного длуства, бо яке порученє бизме з тим послали другим здравственим установом – гварел министер.
Тиж так, министер здравя Златибор Лончар наявел же по Нови рок, на основи конкурсох, буду анґажовани 200 до 300 здравствени роботнїки, спомедзи котрих найвецей лїкаре, а котри длуго волонтировали.