ҐОСПОДЇНЦИ – На тогорочним Сайме гортикултури, етно-детальох и ручних роботох, хтори всоботу, 18. априла отримани у дворе и голу ОШ „Жарко Зренянин” у Ґосподїнцох, були виложени рижни ручни роботи, велї файти рошлїнох до черепчка и до двора и рижни прикраски з рециклажного материялу.
Манифестация урядово отворена з програму у хторей участвовали КУД зоз Жаблю, Чурогу, Дюрдьова и Ґосподїнцох, спортски здруженя и школяре з основних школох зоз жабельскей општини.
Нащивителє у голу школи могли опатриц два вистави, алє и участвовац у рижних роботньох и научиц як з рециклажного материялу мож направиц рижни прикраски за обисце.
Треци Саям у Ґосподїнцох, як часц проєкту „За чистейши и желєнши школи у Войводини”, орґанизовани дзекуюци сотруднїцтву ґосподїнскей ОШ и Еко-здруженя „Баґрен били”, а з цильом же би розвивал еколоґийну свидомосц при дзецох, як и при гражданох нє лєм Ґосподїнцох, алє и цалей општини.
Орґанизованє Сайму фонансийно помогли Покраїнски секретарият за образованє, предписаня, управу и национални меншини-заєднїци и Општина Жабель.
