ШИД – Шеф Одборнїцкей ґрупи Социлядемократскей странки (СДС) у Скупштини општини (СО) Шид Желько Брестовачки обвисцел явносц о пресуди Управного суду з хтору понїщена одлука о його розришеню як предсидателя СО на схадзки отриманей 30. авґуста 2012. року, кед Сербска напредна странка (СНС) превжала власц од демократох.
У присустве даскелїх одборнїкох СДС, Брестовачки гварел же вони буду вимагац схадзку СО Шид на хторей би мала буц випочитована одлука Управного суду и же би ше ознова одлучовало о його розришованю, почитуюци и Статут Општини и Дїловнїк о роботи СО Шид.
Кед же владаюца коалиция пробує обкеровац пресуду, вони знова поглєдаю защиту суду пре нєпоступанє по його одлуки, гварел вчера Брестовачки.