Дзекуюци сушедови з Беркасова, хтори уж там робел, Крешо, хтори по фаху скравец, 2010. року пошол до Дубровнику робиц як келнер. Напредовал у роботи и уж шейсц роки през сезону роби у елитним ресторанє у старим городзе. Од єшенї по яр у Беркасове є зоз фамелию, и теди роби за шивацу машину.
Зоз родимого Заґребу, Крешо Безик дакеди приходзел до Сриму, точнєйше до Шиду, а потим и Беркасова, до дїда и баби по мацери Буилових, през лєто и на одпочивки, а початком дзеведзешатих рокох приселєл до Беркасова за стално. Ту ше оженєл и основал фамелию. По фаху скравец, нє було лєгко достац роботне место, алє якошик достал роботу у „ШИК”-у, дзе му уж робела супруга Любица. Були то чежки роки, кед ше требало попристановиц, здобуц „закрице над главу” и старац ше о двох синох, Звезданови и Ґоранови. Окрем порядней роботи у „ШИК”-у, Безиково робели и шили и дома, кельо могли. Кед спомнуте подприємство препадло, робели за приватнїка. Медзитим, зоз шица нє було лєгко вижиц. Требало робиц ище дацо.
През бешеду Крешо дознал же єден сушед зоз Беркасова роби у Дубровнику як кухар, та 2010. року пошол и вон до историйного Дубровнику поглєдац роботу, а з оглядом же мал горватске державянство, обчековал же нє будзе почежкосци. И, насправди, достал роботу у єдним ресторанє, дзе такой почал робиц як келнер. Примал наручбини и вислуговал госцох.
РОБИ И ДОМА И НА МОРЮ
– Окрем схопносци у роботи, з госцами ше обовязно муши бешедовац по анґлийски, а добре кед ше зна ище даєден странски язик, або кед ше знаю голєм основидаєден странски язик, або кед ше знаю голєм основи того язика пре комуникованє з госцами. До Дубровнику углавним приходза странски туристи зоз рижних бокох швета, як зоз Европи так и зоз ЗАД, а остатнї роки и Японци и Южнокореянци. Од самого початку ми робота добре рушела, алє ше наисце вельо и робело, по цали дзень. Добре сом бул плацени, алє шлєбодного часу було мало, бо требало робиц од дзевец рано до пол ноци. Алє якошик швидко прешли тоти перши шейсц мешаци – здогадує ше початкох роботи у Дубровнику Крешо Безик.
А вец, кед пришла єшень и закончела ше туристична сезона, врацел ше до Беркасова задовольни. През жиму мал досц шлєбодного часу, алє же би бул и теди од хасну, шедал за шивацу машину и шил цо уж требало. За тоти шейсц мешаци у Дубровнику упознал и досц людзох, други видзели яки є роботнїк, так же шлїдуюцей сезони, 2011. року на роботу пред початком туристичней сезони пошол вельо розтерхованши. Пошол робиц до другого ресторану, хтори вельо векши, ма 25 занятих и понука мексиканске єдло и напой, и вола ше „Bona fide”. У тим ресторанє роботни час му бул осем годзини, а кед роби вецей, шицко окреме плацене. Лєм ґазда одредзує хтори роботи будзе окончовац, дзе ше уж укаже потреба. Вецей од роботного часу може робиц як помоцни келнер або як аниматор госцох (хтори з улїци поволує туристох же би вошли до ресторана). И так уж шейсц роки Крешо од конца априла по конєц октобра препровадзує у Дубровнику, а остаток рока у Беркасове. Того року мал досц роботи у обисцу на вибудови окремного будинка у дворе, дзе премесци роботни простор за шице хторого ше нє одрека. На щесце, шицко поробел на час, так же концом априла одпутовал на морйо робиц.
У ДУБРОВНИКУ ШЕ СТРЕТАЛ И ЗОЗ ПОЗНАТИМА ЗОЗ КРАЮ
Гоч гвари же найвекша часц странских госцох зоз державох Европи и швета, случовало ше же єст подаєден госц и з того подруча.
– Бул сом нєсподзивани кед сом у Дубровнику опрез ресторана видзел єдну Беркасовчанку. Вона була на рочним одпочивку у Чарней Гори, та пришла дакус опатриц и Дубровник. Шпацировала ше и наишла на ресторан дзе я робим, а я бул опрез нього. И вона була нєсподзивана кед ме ту видзела. Тиж були и два панї зоз Сримскей Митровици. По бешеди сом такой знал же су зоз Сербиї, и кед сом ше им опитал, вони ме лєм попатрели, а я им одвитовал же я з Беркасова при Шиду. През лєто на одпочивок приходзи и супруга Любица и синове Звездан и Ґоран – гвари Крешо.
Наш собешеднїк нам гвари же його длужносц кед рано придзе до ресторану, преконтроловац чи шицко сцигло цо келнере дзень пред тим поручели од напою и єдзеня. Кед шицко у шоре, вец ше отвера ресторан, а його длужносц и же би мерковал на других занятих як робя и о шицким дава звит ґаздови ресторана, алє и далєй роби и келнерски роботи у цеку роботного часу. З оглядом же му син Ґоран матуровал у штреднєй економскей школи у Сримскей Митровици –напрям кухар, и вон того лєта пошол до Дубровнику ґу оцови, та роби у кухнї. А кед ше на єшень ознова враци до Беркасова, Крешо будзе вєдно зоз фамелию и ознова шеднє за шивацу машину и так през жиму помогнє супруги Любици, хтора як шивачка роби у єдного приватнїка у Шидзе.
ЗАРОБОК И ПРЕЗ ЖИМУ
З оглядом же Крешо ма горватске державянство, кед му прейдзе шейсцмешачна робота и кед ше враци дому, вон тиж достава надополнєнє зоз Горватскей. Тото надополнєнє му виплацує Служба за обезпечованє роботи, покля ознова на яр нє почнє робиц.
