НОВИ САД – На нєшкайшей схадзки Скупштини АП Войводини пред посланїками будзе Нарис одлуки о ребалансу буджету Покраїни, по хторим буджет за 2016. рок 59,5 милиярди динари, цо за 1,72 милиярди вецей як предвидзене у децембру 2015. року.
Пре векши процент наплацених порцийох, приходи Покраїни звекшани за 521,78 милиони динари. Приманя од предаваня нєфинансийного маєтку звекшани за 10,84 милиони, а од финансийного – наплацованя длуствох и приходох од приватизациї – за 421 милион.
На другим боку, зменшани донациї и помоц хтори давали Европска уния, держава и други уровнї власци, а по урядових информацийох, держава зменшала средства за Покраїну пре рационализацию занятих у АПВ. По предложеним ребалансу и розходи векши за 1,72 милиярди динари.
Як сообщела Скупштина АПВ, з ребалансом ше обезпечи пенєж за шицки активносци и обовязки – виплацованє надополнєня за треце дзецко, роботи на Жежельовим мосце, судски и други трошки у тужбох процив Управи за капитални укладаня АПВ, реґрес драгових трошкох за школярох. Заплановане и финансованє набавки опреми за здравствени установи, обнавянє робних резервох, помоц поднїмательом и други проєкти.
З Нарисом ребалансу вообще нє наменєни средства за потримовку Войводянскей академиї наукох, уметносцох и култури (ВАНУК) од 2 милиони динари, а виостаню и средства за проєкт хаснованя гидротермичних ресурсох од 4,5 милиони динари.
На дньовим шоре нєшкайшей схадзки и предлог о розришеню директорки Покраїнского заводу за ровноправносц полох Весни Шиячки, а на єй место ми мала буц поставена Диана Милович.