НОВИ САД – На вчерайшей схадзки Скупштини Войводини посланїки прилапели шейсц амандмани на Закон о польопривредней жеми. Конкретно, покраїнски од републичного парламенту вимага же би нє прилапел члени хтори оможлївя предаванє державней польопривредней жеми и даванє державней жеми под аренду на 30 роки. За тоту одлуку гласали посланїки владаюцей коалициї у Войводини – ДС, ЛСВ и СВМ, а процив були СНС и СПС.
Амандмани на схадзки Скупштини потолковали предсидатель Покраїнскей влади Боян Пайтич и покраїнски секретар за польопривреду, водопривреду и лєсарство Бранислав Боґарошки, котри Скупштину Войводини будзе представяц на зашеданю Скупштини Сербиї. Як поведзене у толкованьох, предложени закон треба поцагнуц зоз скупштинскей процедури и написац цалком нови.
Найзначнєйши амандмани ше одноша на можлївосц же би ше у городох и општинох правним особом под аренду давало 30 одсто державней жеми на 30 роки. Попри нєскладаня з тоту задумку, зауваги дати и на одлучованє о таким даваню жеми под арендум, понеже би о тим одлучовала комисия Министерства, цо отвера коруптивни сеґмент.
Покраїна процив предаваня державней польопривредней жеми, без огляду же ше Сербия на тото обовязала з подписованьом Спорозуменя о стабилизованю и придружованю, алє Покраїнска влада предложи же би ше тото право огранїчело.
Посланїк Сербскей напредней странки (СНС) Дьордє Миличевич гварел же старосц ДС и ЛСВ о парастох фалшива, понеже ю нє указали кед у приватизованю жем закончела у рукох тайкунох, та оценєл же слово о предвиберанковей кампанї.
Миличевич гварел же ше з часцу Закона хтора оможлївює уступанє 30 одсто жеми правним особом жада посцигнуц фунционалносц шицкей жеми, баланс статкарскей и польодїлскей продукциї и звекшац вивоз.
Посланїк Демократскей странки (ДС) у Скупштини Войводини Ненад Борович наявел же кед Скупштина Сербиї прилапи Закон о вименкох и дополнєньох Закона о польопривредней жеми, тота странка поруша виробок нового тексту закона.