НОВИ ПАЗАР – После нєотримованя схадзки Совиту за национални меншини Влади Републики Сербиї, хтора пре нєвигласованє предложеного дньового шору з боку членох Совиту – векшини предсидательох националних совитох (НС) националних меншинох у Сербиї – одложена до дальшого, до Рутенпресу вчера о тим сцигло службене сообщенє у мено Координациї НС-ох, а з Националного совиту Бошнякох, понеже предшедуюци Координациї НС-ох тераз предсидатель НС Бошнякох др Сулейман Уґлянин.
– На схадзки Совиту за национални меншини Влади Републики Сербиї, пияток, 16. децембра у Беоґрадзе, представителє НС-ох националних меншинох наступели зоз заєднїцкима становисками и єдинствено. У мено шицких меншинох бешедовал предшедуюци Координациї НС-ох др Сулейман Уґлянин и вимагал одкладанє точкох дньового шору хтори ше одношели на Нарис звиту о запровадзованю Акцийного плану за витворйованє правох националних меншинох, на Нарис закона о вименкох и дополнєньох Закона о защити правох и шлєбодох националних меншинох, як и на Предлог приоритетней обласци финансованя за 2017. рок з Буджетного фонду за национални меншини. Окладанє спомнутих точкох по шлїдуюцу схадзку Совиту за национални меншини глєдане бо ше нє здобуло условия за їх розпатранє и прилапйованє – гвари ше у сообщеню з Координациї, написаним 17. децембра.
– Предсидателька Совиту за национални меншини, министерка Ана Брнабич одбила вименки дньового шору, неґировала постоянє Координациї и право предшедуюцого Координациї же би бешедовал у мено шицких НС-ох – пише у сообщеню.
После розправи о нїм, предложени дньови шор з векшину гласох нє прилапени, та предсидателька Совиту „министерка державней управи и локалней самоуправи Ана Брнабич претаргла схадзку и одложеля ю до дальшого, нє одредзуюци час и датум отримованя”.
– Национални совити поєдинєчно и Координация НС-ох, як колективни орґан, жадаю буц третировани як леґитимни и референтни партнер, а нє як обєкт – гвари ше у сообщеню з Координациї, закончуюци же „национални меншини репрезентативни субєкт и як НС-ти и як Координация, а у цалосней популациї Сербиї, меншини творя 17 одсто жительства”.