НОВИ САД – Министер нукашнїх дїлох Небойша Стефанович гварел вчера же вкупне число криминалних дїлох у Войводини од мая по новембер прешлого року зменшане за 8,9 одсто у одношеню на исти период 2013. року.
Стефанович у Новим Садзе присуствовал на схадзки Совиту за безпечносц Скупштини Войводини за безпечносц, на хторей прецизовал же у тим периодзе число криминалних дїлох зоз 36 609 зменшане на 33 366.
Найчисленши маєтни деликти, хтори творя 73,4 одсто шицких криминалних дїлох, алє су у одношеню на 2013. рок зменшани за коло 17 проценти. Тиж зменшани и зраженя на медзинационалней основи.
Полиция од мая по новембер вжала 460 фалати оружия, а як гварел Стефанович, найвекше гроженє од илеґалного оружия хторе маю гражданє, бо 93 одсто виновни дїла зробени праве з тим оружийом.
Стефанович наложел началнїкови новосадскей полициї Синишови Радаковичови же би на ютре послал єдно полицийне оддзелєнє на Нове населєнє, часц Нового Саду у хторей нєт полицийней станїци и у хторим єст найвецей криминалу, а пошвидко там почнє робиц и полицийна станїца.
Схадзку Покраїнского совиту за безпечносц отворел предсидатель того цела и Скупштини Войводини Иштван Пастор, хтори оценєл же у полициї у Сербиї нєт досц припадїнкох меншинских националних заєднїцох.
Член Покраїнского совиту за безпечносц, покраїнска посланїца Лиґи социялдемократох Войводини Мая Седларевич, на схадзки критиковала факт же лєм коло три одсто жени на руководзацих функцийох у полициї.