На европским стретнуцу младих, хторе отримане од 28. децембра 2015. року по 1. януар того року у Валенсиї у Шпаниї, участвовали коло 30 тисячи младих з европских жемох, а медзи нїма були и дзеведзешат паломнїки зоз Сербиї.
Тото паломнїцтво довирия на жеми, як го наволую, орґанизовала християнска заєднїца „Тезе”.
Були вирни зоз Суботици, Сримскей Митровици, Нового Саду, Вербасу, Коцура, Керестура и других местох у Войводини, як зоз нашого апостолского еґзархату, так и зоз других заєднїцох.
Нашо млади вєдно зоз другима участвовали на заєднїцких молитвох хтори були орґанизовани у центре городу, у шатрох и у валенсиянскей катедрали.
Молитви и програми були орґанизовани и у вецей як 150 парохийох у Валенсиї и єй околїску, до хторих млади були розпоредзени по менших ґрупох. Под час стретнуца, млади пребували у фамелийох хтори им за тоту нагоду понукли свой дом и госцопримство.
През днї пребуваня у Валенсиї, на роботньох и бешедних ґрупох младих провадзена тема милосердия, хтора була мото цалого стретнуца. Зоз молитву за мир у швеце и познєйше фестивалом народох, на хторим ше могли упознац зоз шицкима державами – учашнїками стретнуца, млади у своїх парохийох дочекали и Нови 2016. рок.
У шлєбодним чаше могло розпатрац Валенсию, город у хторим людзе отворени, щири, бешедлїви и вше нашмеяни, у хторим шицки знаю рихтац паелю, їх националне єдло, дзе помаранчата рошню и на польох, у паркох и по улїцох, город у хторим ше, остатнього дня, у року мож боси шейтац по плажи… На драги по Валенсию млади мали нагоду обисц Дєнову и Монако, а при врацаню дому, Барселону и Милано.
Шлїдуюце европске стретнуце младих будзе отримане у истим чаше, у Риґи у Летониї. Потамаль „Тезе” зєднїца будзе орґанизовац вецей менши стретнуца и молитви, а млади вше можу нащивиц и заєднїцу у валалє Тезе у Французкей.
ДВАНАЦ БОБКИ ГРОЗНА
Млади паломнїки ше у Валенсиї, попри других красних искуствох стретли и зоз цикаву шпанску традицию хтора ше нїяк нє вихабя у новорочней ноци – кажде на преславу Нового року одходзи зоз мещком, лєбо мисочку зоз дванац бобками грозна. Кед церква почнє дзвонїц на пол ноци, церковни дзвон биє дванац раз, и за кажде оддуркованє поє ше по єдну бобку.
Шпанци толкую же то за добри и просперитетни наступни рок, а паломнїки дзечнє прилапели тоту традицию и перше цо поєдли у новим року були праве тоти дванац бобки грозна.
