СЕЧАНЬ – На Покраїнскей, ювилейней 50. смотри рецитаторох „Поето народу мойогоˮ у Сечню, од 12. по 14. април, рецитаторе хтори рецитовали по руски посцигли значни успих. Ема Живкович освоєла друге место у младшим возросту, и вєдно зоз Минеу Югас у штреднїм возросту, обидва зоз Руского Керестура, пласовали ше на Републичну смотру у Валєву.
У младшим возросту медзи осемнац найлєпшима рецитаторами була и Яна Варґова, а у истим возросту рецитовал и Иван Молнар зоз Дюрдьова.
Валентина Салаґ з Дюрдьова у старшим возросту була медзи двацец шейсц найлєпшима рецитаторами, а у истим возросту рецитовал ище Йован Живкович.
У штреднїм возросту медзи двацец єдним рецитатором була и керестурска рецитаторка Валентина Новта.
Фахово консултанти були Амалия Ковач и Мирослава Даждиу.
З оглядом же то була ювилейна, 50. Покраїнска смотра рецитаторох, орґанизаторе ше здогадли длугорочних рецитаторских ентузиястох котри вецей нє медзи нами, медзи котрима и Владимира Бесерминя и Михайла Зазуляка.
Додзелєни Специялни грамоти за длугорочну континуовану роботу, як и Грамоти за континуовану роботу и резултати у рецитаторским руху, котри достали Наталия Ґрунчичова зоз Суботици, Амалия Ковач зоз Кули, Яким Гарди зоз Дюрдьова и Ивана Дудаш зоз Руского Керестура.