БАЧИНЦИ – Вчера, 31. октобра, на швето Святого апостола и євангелисти Луки по юлиянским календаре, церква и вирни у Бачинцох преславели храмове швето – Кирбай, 166. по шоре. Архиєрейску Службу Божу предводзел апостолски еґзарх за грекокатолїкох у Сербиї владика Георгий Джуджар, а сослужели священїки з нашого Апостолского еґзархату, Крижевского владичества, як и римокатолїцки.
У казанї преосвящени владика бешедовал о живоце апостола и євангелисти Луки, котри бул лїкар и иконописец, а як єден спомедзи 70 апостолох, ширел Боже слово и вельо зробел у ширеню християнскей науки. Ґу тому, написал и Святу Євангелию.
– Апостол Лука нєбесни покровитель и заступнїк бачинскей церкви и прето ше модлїме же бизме прейґ його заступнїцтва достали Божи благослов – наглашел владика Георгий.
Домашнї парох о. Дарко Рац подзековал владикови, священїком, чесним шестром и вирним же возвелїчали швето, а на Служби присуствовала и народна посланїца у Скупштини Сербиї Олена Папуґа, чесни шестри Василиянки з Вуковару и Заґребу, чесни шестри Служебнїци з Нового Саду, православни парох з Бачинцох о. Дарко Данґузов, предсидатель Совиту Месней заєднїци Бачинци Слободан Лазаров и други госци.
По Служби бул традицийни обход коло церкви з читаньом євангелийох, а на Кирбаю було надосц вирних .