КОЦУР – „Коцурске здруженє младих” (КУМ) на тогорочней Акция младих „Дай и ти свою руку”, хтора отримана од 24. по 26. юлий, у Коцуре привитало коло 120 акцияшох з цалей Сербиї, а после змесцованя по обисцох, перши дзень на Акциї отримани роботнї на хторих ше акцияше упознали з Акцию и Коцуром, а потим стренуце младих шветочно отворене у Доме култури.
Акцию отворел предсидатель КУМ Стеван Самочета, а присутних привитали и заменїк предсидателя Општини Вербас Милан Ґлушац, як и заменїк предсидателя Рускей матки Миломир Шайтош.
На отвераню премиєрно виведзена и представа Драмскей секциї КУМ „Преостале пустоловине”, по тексту и режиї Иґора Пушкаша, а одбавели ю Александра Русковски, Давид Кулич, Никола Салонтаї и Катарина Кулич.
За акцияшох пияток вечар орґанизовани и рок-концерт на хторим участвовали домашнї состав „Демиґод”, „Директ Драйв” зоз Зренянину и „Геви вок” з Кули. З тим концертом отворена и пред саму Акцию реновирана бина. Проєкт адаптациї координовал Вербаски едукативни центер, а сотруднїк у координациї бул и предсидатель КУМ Стеван Самочета.
Волонтере всоботу на роботней акциї ушорйовали явни поверхносци у валалє, садзели древка, а єдна часц младих помагала по обисцох старим и нємоцним.
Всоботу тиж отримани роботнї и рижни шлєбодни спортски, културни и едукативни активносци, а дзень закончени з ноцним купаньом на базену у Вербаше.
Остатнї дзень Акциї, внєдзелю, млади присуствовали на Служби Божей у грекокатолїцкей церкви, а пред одходом ше дружели на „Войовим салашу”.
