РУСКИ КЕРЕСТУР – У Руским Керестуре тирва Медзинародни волонтерски камп „Summer in Ruski Krstur“ („Лєто у Руским Керестуре“), хтори почал 17., а будзе закончени 30. авґуста. Попри з нашей жеми и з Керестура, Волонтерски камп традицийно зазберує и волонтерох з иножемства, так же на тогорочним участвую седмеро волонтере з Турскей, Шпаниї, Русиї, Финскей, Ческей и Горватскей (з Миклошевцох), двойо зоз Сербиї, та домашнї млади волонтере.
За два тижнї тирвана Кампу волонтере ушорюю дзепоєдни места у валалє, та прешлого тижня обилєли мур у дворе керестурскей дзецинскей заградки и пораєли базен, а початком того тижня зоз членами Церковного одбору почали фарбенє огради на керестурским теметове.
Попри роботней часци, волонтере под час Кампу маю орґанизовани и провадзаци активносци, як цо то нащива Националному совиту, рижни роботнї, екскурзию до Нового Саду и подобне.
У сотруднїцтве з Волонтерским центром Войводини, Медзинародни волонтерски камп уж други рок орґанизує Туристичне здруженє Руски Керестур, а водза го Иван Канюх и Милица Кнежевич.
Волонтерски камп финансийно потримую Роботне цела за младеж Националного совиту Руснацох и Месна заєднїца Руски Керестур, а лоґистичну и одредзену материялну потримовку даваю и Основна и штредня школа з домом школярох „Петро Кузмяк“, керестурски „Каритас“, та поєдинци з Керестура.
