РУСКИ КЕРЕСТУР – У Штреднєй школи „Петро Кузмяк” пияток означени 22. април, Дзень планети Жеми, а окремну активносц з тей нагоди професорка биолоґиї Тереза Катона витворела зоз штредньошколцами хтори наставу окончую по ИОП-у (Индивидуалней образовней програми).
Школяре з тей нагоди сцели указац на нагромадзованє пластичного одпаду и як вон загрожує живи штредок, та направели планету Жем з материялу хтори ше рециклує як цо стари папер и мещки, и наполнєли ю з пластичнима фляшками.
По словох професорки Катоновей, на тот способ сцели прицагнуц повагу других школярох а презентация тей роботи зоз сликами була виложена у школским голу.
Источашнє школяре актере мали нагоди учиц през интердисциплинарни приступ и розвивац одредзени важни схопносци.