ДЮРДЬОВ – На швето Собору архистратига Михаила, всоботу 21. новембра, у грекокатолїцкей церкви св. Архангела Михаила у Ґосподїнцох вирни преславели Храмовне швето – Кирбай.
Кирбайску Службу Божу служел о. Платон Салак ЧСВВ капелан у Кули котри у казанї гуторел о тим яку моц маме у духу кед зме з Богом, о пеклу и ангелох, теди спомнул и архангела Михаила чийо мено ноши наша церква у Ґосподїнцох. Под час Служби було кресценє єднорочного Михаила Хромиша котре окончел о. Михаил Холошняй ґосподїнски парох. Служба уживо преношена на Фейсбук профилу домашнього священїка о. Михаила Холошняя – Фейсбук профилу дзе ище вше мож опатриц знїмок.
Дзень пред Кирбайом, пияток 20. новембра, було Всеночне котре служел о. мр Дарко Рац протореєр ставрофор и парох у Бачинцох.
На Кирбай у Ґосподїнцох вирни з членами Церковного одбору у своїм парохиялним доме вше орґанизую друженє и святочну програму, медзитим того року пре нєзавидну епидемиолоґийну ситуацию з Ковидом-19, алє и пре мири котри ше муша запровадзовац, нє орґанизована нїяка подїя.
