Пошвидко после нєщесца на импровизованим спортским терену у Дюрдьове у населєню Телеп, дзе страдал шейсцрочни хлапец Урош Планчак од вдереня капури за ґол, склонєни шицки спортски реквизити. Спортски реквизити и бависка склонєти з вецей нєлеґалних спортских полиґонох и дзецинских бавилїщох у шицких штирох местох у Општини Жабель.
Мешац после траґедиї розписани тендер за препатранє леґалних полиґонох и бавилїщох хтори препаднул. Цали рок прешол, а спортски терени ище нє препатрени. На Телепу, часци Дюрдьовa дзе ше дзеци бавели вецей як два децениї, a старши роками орґанизовали фодбалски турнири, вецей нїхто нє копа лабду на ґол.
После нєщесца на схадзки Општинскей ради Општини Жабель принєшени даскельо одлуки вязани за безпечносц на спортских теренох и бавилїщох, алє анї єдна ище вше нє витворена.
– Зоз шицких нєлеґалних спортских полиґонох и бавилїщох у општини, Комунална инспекция сколонєла шицки спортски реквизити, док ше их нє почнє препатрац. Теди тоти реквизити годни врациц, алє ше буду мушиц присподобиц же би виполньовали Закон о безпечносци. Кед ше тото нє покончи, нє враци ше их – гварел Витомир Лисица, член општинскей ради задлужени за спорт.
Месни заєднїци з местох жабельскей општини мали задаток явиц o локациї спортских теренох компетентней служби општини котра ма законску обoвязку старац ше о їх исправносци и безпечносци.
Импровизовани спортски терен на општинскей жеми на Телепу, по нєщесце, найвецей ше хасновaло за бавенє фодбалу, бо були поставени ґоли. Познєйше тиж так и за одбойку, бо гражданє з Телепа з мехох направели мрежу. Сами го отримовали, кошели траву и поставяли рeквизити на яких ше дзеци и младеж жадала бависц. Но, велїм ище вше нє ясне хто ше мал остарац о тим терену, бо дзеци би ше бавели, а нє мали дзе.
Єдини леґални спортски терен, котри тиж у подлим стану, и дзецинске бавилїще находза ше аж у центре валалa дзе дзеци нє шму пойсц сами пре трaнспортни превозки и оддалєносц, коментарую жителє Телепу.
– Гражданє котри сцу поставиц даяки спортски реквизит на явней поверхносци треба же би ше перше консултовали з компетентнима институциями. Насампредз з комуналну инспекцию. По розписованю тендера препатри ше спортски терени, стадиони, спортски гали, школски сали, бавилїща у паркох за дзеци и шицки справи и бавилїща котри дзеци и гражданє хасную на териториї општини – гварел Витомир Лисица.
Вон тиж надпомнул же пошвидко будзе розписани нови тендер за препатранє исправносци бавилїщох, бо гевтот пред тим, препаднул пред роком. Єдина фирма котра теди конкуровала нє мала подполну документацию, та тендер понїщени, а цала акция препатраня спортских теренох застановена.