На треци дзень Сошествия св. Духа – Русадля 6. юния на Завитни дзень у Водици, зме преславели єй 200-рочнїцу. Тельо прешло од 1817. року, од перших нєзвичайних указаньох у тедишнєй студзенки у полю нєдалєко од Руского Керестура, дзе ше розвило єдине нашо Марийово святилїще.
Над олтаром дзе служена Архиєрейска литурґия, з ружових квиткох вискладане число 200, цо ме инспировало за наслов того уводнїка.
Бо, наисце, 200 роки – як 200 ружи Мариї Водицовей уткани до историї того святого и глїбоко духовного места. Ту ше вона надприродно указала, ту ше ставали и ставаю ше и нєшка чудесни физични и духовни виздравеня и навраценя. Мария тото место вибрала же би нас ту зазберовала и зєдиньовала. Нє лєм нас грекокатолїкох, алє и братох заходного обряду, и других деноминацийох, нє лєм нас Руснацох, Українцох, у давней прешлосци и други околни народи – Нємцох, Мадярох, Сербох… У новшим чаше, духовно обчаровани з тим местом и тоти цо туристично зайду до Водици…
Водица и нєшка збера на богослуженя, молитву, рижни стретнуца и друженя дзецох, младих, старших. Прицагує шицких, окружена з цихосцу родних польох и глїбоким миром. Водица, од влонї и у заєднїци з Церкву Мария Маджоре у Риме, и тирваце одпустове место.
Позберала нас и на свою 200-рочнїцу, од найвисших церковних особох по вирних зоз велїх наших парохийох, источашнє по обидвох календарох, цо тиж мале чудо. Прицагла и тих цо ше розошали ширцом по швеце, госцох з даскельо державох… Шицки „200 ружи” Водицовей Мариї останю и публиковани за нєшкайши и нови ґенерациї у кнїжки, брошури, флаєру.
„Покля будзе Водици – будзе и нас” – давно пророковал дакедишнї архиепископ Йоаким Сеґеди. Най и надалєй у наших шерцох одгукую тоти слова.