РУСКИ КЕРЕСТУР – У орґанизациї Фодбалского клуба „Русин” штварток, 15. авґуста закончени традицийни 51. ноцни турнир у малим фодбалу у Руским Керестуре.
У стретнуцох за треце место и у финалним стретнуцу Керестурски екипи мали половни успих. Треце место на турниру освоєла екипа Клуб 10 зоз Руского Керестура хтора була лєпша як екипа Амбасада зоз Кули и победзела зоз резултатом 3:0, док у финалним стретнуцу екипа Бостон зоз Руского Керестура страцела од екипи Бачкого Ґрачцу зоз резултатом 4:1.
За найлєпшого бавяча на турниру преглашени Стефан Тома зоз екипи Бостон, за найлєпшого ґолмана преглашени Александар Драґутинович зоз екипи Клуб 10, док за найлєпшого стрилца на турниру преглашени Оґнєн Маркович зоз екипи Амбасада зоз Кули.
При пионирох финалне стретнуце бавели Модена стил процив екипи Панония Лалить и у тим стретнуцу победзела екипа зоз Лалитю зоз резултатом 2:0.
При младших пионирох финалне стретнуце бавели Кула процив екипи РК Проєкт, а у тим стретнуцу победзела Керестурска екипа зоз резултатом 1:0.
Побиднїк ноцного турнира Бачки Ґрачац освоєл 150 тисячи динари и шампионски погар, другопласовани Бостон освоєл 50 тисячи динари, док трецепласована екипа Клуб 10 освоєла 30 тисячи динари.
Орґанизатор ноцного турнира у малим фодбалу бул ФК „Русин”.
